«Бала бақыты мен ата-ана сенімі астасқан Шаттық ордасы»
«Бала бақыты мен ата-ана сенімі астасқан Шаттық ордасы»
№38 «Шаттық» балабақшасы – атауының мәнін айқын көрсететін, мейірім мен адамгершілікке толы ұя. Елорданың қақ төрінде орналасқан аталған мекеме – жүздеген баланың алғашқы білім ордасы, саналы өмірге бастайтын алғашқы баспалдақ. Мұнда тәрбиеленушілердің бойында адамгершілік, ізгілік, мәдениетті қарым-қатынас қалыптастыруға бағытталған орта жүйелі түрде жұмыс істейді. Тәрбие мен оқыту үдерісі мемлекеттік стандартқа сай жүргізілгенімен, ұжымның басты ерекшелігі – шығармашылық еркіндік пен ұлттық бағыттың ұштасуы. Шаттыққа толы шарапаты мол топтарда сабақ мазмұны баланың жас ерекшелігі мен қызығушылығына қарай әдеттен өзгерек бейімделіп өтеді. Музыка мен бейнелеу, тіл дамыту мен ойлау қабілетін жетілдіруге арналған сабақтар бір-бірімен үндесіп, баланың танымдық көкжиегін кеңейтеді. Ұлттық рух пен ұрпақ ұлағаты астасқан осы ортада тәрбиеленушілер қазақ халқының мәдениеті мен дәстүрін, тілдік ерекшеліктерін бойына сіңіріп өседі. Сол арқылы ұжым тек білім емес, рухани тәрбие берудің де орталығына айналған.
Шаттықтағы педагогтар мен әдіскерлердің алға алған мақсаты – бүлдіршіндердің ойлау қабілетін дамытып, шығармашылық әлеуетін ашу. Тәрбиешілер баламен жеке жұмыс жүргізіп, оны тыңдай білуге, пікірін бағалауға үйретеді. Осындай қарым-қатынас нәтижесінде баланың өзін-өзі бағалауы мен сенімділігі қалыптасады. Болашақ иелеріне арналған сабақтар ойын элементтерімен өріліп, баланың белсенділігін арттырады. Ұстаз махаббаты арқылы қонған келелі тәрбие қатып қалған ережелер жиынтығынан өзге өмірдің табиғи бөлігіне айналады.
Жуырда осы ортада ерекше мазмұнды шара «Білгенге маржан» атты ата-аналар сайысы ұйымдастырылды. Мұндағы мақсат – айқын. Ата-аналарды балабақша өміріне тарту, салт-дәстүр мен тілдің қадірін ұғындыру, сондай-ақ бала тәрбиесіне ортақ үлес қосу. Шаттықтың жұрт көңілін шаттандырар бастамасы ата-аналар мен педагог арасындағы серіктестіктің сұлу суреттей көрінісі болды.
Сайыс бірнеше бөлімнен тұрды. Қатысушылар мақал-мәтел айтып, мағынасын түсіндірді, ұлттық дәстүрге қатысты сұрақтарға жауап беріп, өнер көрсетті. Әр топтың ата-анасы өз ықыласын, шеберлігін және рухани дүниесін паш етті. Бірі бақшадағы ата-ана мен ұстаз арасындағы коммуникация мен орын алар келеңсіздіктер туралы қызық қойылым қоса, енді бірі гитараның үнімен астасқан әуезді ән салды. Байқауда туралығын айтқан әділ қазылар әр қатысушының дайындығындағы шынайылық пен шын шабытты көре білді. Балабақша бүлдіршіндері қалыспай, ата-аналардың байқауында өз өнерлерін ортаға салды.
Меңгеруші Ажар Қуанышпайқызы іс-шара алдында сөз алып, ата-аналар мен педагогтарға алғысын білдірді. Ол ұжымның ұстанымын айта келіп: «Бала тәрбиесі – қоғам алдындағы ең жауапты іс. Біз тәрбие мен білім беруді қатар дамытуды көздейміз. «Адал азамат. Біртұтас тәрбие» бағдарламасы арқылы бала бойына адамгершілік ұғымын сіңіріп, айналасына ізгі ниетпен қарауға баулимыз. Осындай сайыстар ата-аналар мен педагогтардың ынтымағын арттырып, балалардың бойына сенім ұялатады. Әрбір іс-шараның түпкі мәні – балаға өнеге көрсету. Ата-анасы сахнада өнер көрсетіп, баласы соған куә болған сәт – тәрбиенің ең көркем көрінісі. Себебі, отбасы мен балабақша арасындағы байланыс осындай шаралар арқылы нығая түседі. Біз бала бойына ұлттық құндылық пен адамгершілікті дарытуды басты мақсат етеміз. Бүгінгі кішкентай тәрбиеленуші – ертеңгі елдің азаматы», – деді.
Шараның мазмұнын байыта түскен әдіскер Шынар Сыздыққызының еңбегі де елеулі. Ол сайыстың барлық кезеңін жүйелі ұйымдастырып, тәрбиелік бағытты тереңнен ашуға күш салды. Әдіскердің айтуынша, мұндай шаралар педагогикалық үдерістің бір бөлігі ретінде қарастырылуы қажет. «Балаға үлгі болу үшін ата-ана мен тәрбиеші ой, сөз, іс жағынан үндес болуы тиіс. Осындай кездесулер сол үндестікті қалыптастырады. Бір бағытта әрекет еткен ұжым мен ата-ана арасындағы сенім баланың тұлға ретінде дамуына үлкен ықпал етеді. Осындай бірлік пен өзара түсіністік арқылы №38 «Шаттық» балабақшасы «Адал азамат. Біртұтас тәрбие» идеясын күнделікті өмірдің бөлігіне айналдырып келеді. Ізгілік пен ықыласқа толы ортада өсіп келе жатқан әр бала – ертеңгі елдің үміті, қоғамның рухани тірегі.», – деді ол.
Қатысушы ата-аналар да сайысқа үлкен жауапкершілікпен келген. Олар шараның тәрбиелік мәнін жоғары бағалап, ұйымдастырушыларға алғыс айтты. Бірі: «Бүгін ұлым Аланның орнында болып, оның бақшадағы өмірін жақыннан көрдім. Күнделікті өмірдің қарбаласында баламен осылай бірге уақыт өткізу сирек. Ал мұндай сәттер бізді жақындатады, өзара түсіністік пен жылулықты арттырады. Біз бірге сахнада болдық, бірге күлдік. Осындай сәттер ата-ананы да, баланы да жақындастырады. Кейде жұмыспен жүріп, мұндай мүмкіндіктер азайып кетеді. Ал осындай орта адамды жаңаша ойлауға итермелейді», – десе, енді бірі балабақшаның тәрбие жүйесін жоғары бағалап, педагогтардың еңбегін ерекше атап өтті.
Сайыстың рухын сезінген тәрбиешілер де өз әсерімен бөлісті. «Бала үшін ата-анасының қатысуы үлкен шабыт. Олар өздерін сахнада көріп, қуанады, демек – осындай шаралар баланың рухани әлеміне жылылық әкеледі», – дейді балабақшаның Қазақ тілі маманы Азиза Ақжолқызы. Оның айтуынша, тәрбие – үздіксіз процесс, ал ата-анамен серіктестік – сол процестің ең маңызды бөлігі.
Соңында барлық қатысушыларға алғыс хат пен естелік сыйлықтар табысталды. «Шаттық» балабақшасы жыл сайын түрлі бағыттағы тәрбиелік жобалар ұйымдастырып келеді. Әр шараның өз арқауы, өз мәні бар. Ұжым ұлттық тәрбие мен заманауи әдістемелерді ұштастыру арқылы педагогикалық тәжірибені жаңартып отыр. Балабақша қабырғасынан шыққан балалар мектеп табалдырығын сеніммен аттап, өз ойын еркін жеткізе алатын тұлға ретінде қалыптасуда. Мұның бәрі – кәсіби ұжымның тынымсыз еңбегі мен балаларға деген сүйіспеншілігінің нәтижесі.
Осындай жұмыстардың арқасында №38 «Шаттық» балабақшасы тәрбиенің де, сенім мен бірліктің де ордасына айналып отыр. Ата-ана мен педагог бір мақсатта жұмылғанда, баланың болашағы да нұрлана түсетіні анық. «Білгенге маржан» сайысы соның нақты айғағы. Ұйымшылдық пен ізгілік тоғысқан сәтте, шынайы шаттықтың да, рухани өсудің де бастауы пайда болады.
Шаттық Сәдуақас
«Білім айнасы», Астана
